Maxfiylik siyosati

2026-yil 6-avgustda yangilangan

Hujjat yurist ishtirokisiz tayyorlangan. Noaniqlik yoki bahsli ifodani ko'rsangiz — Telegramga yozing, to'g'rilaymiz.

Qisqacha

Biz kam narsa yig'amiz: pochta, parol, ism, diagnostikadagi javoblar va har qanday sayt yozadigan texnik so'rov ma'lumotlari. To'liq ro'yxat — quyida.
Bu ma'lumotlarni sotmaymiz va reklama tarmoqlariga bermaymiz.
Ma'lumotlaringiz nusxasini olmoqchi yoki akkauntni o'chirmoqchi bo'lsangiz — Telegramga yozing, havola shu sahifaning oxirida.

LYprep — O'zbekiston akademik litseylariga kirish imtihoniga tayyorlash xizmati.
Xizmatni jismoniy shaxs yuritadi, hozircha ortida yuridik shaxs yo'q. Buni ochiq yozamiz, chunki ma'lumotlaringizni kim qayta ishlashini bilishga haqqingiz bor.
Ma'lumotlar bo'yicha yagona aloqa kanali — Telegram, havola shu sahifaning oxirida. Alohida murojaat formasi va support-pochta hozircha yo'q. Bir necha kun ichida javob beramiz; bir hafta javob bo'lmasa — qayta yozing.

Elektron pochta — akkauntingiz va saqlangan natijaga kirish bo'lishi uchun.
Parol. U hech qayerda ochiq ko'rinishda saqlanmaydi: uni autentifikatsiya xizmati xeshlaydi va biz uni ko'rmaymiz.
Ro'yxatdan o'tishda kiritgan ismingiz.
Diagnostika savollariga javoblar, har bir savolga ketgan vaqt va hisoblangan natija.
Sayt hostingi va Supabase yozadigan texnik so'rov ma'lumotlari: IP-manzil, brauzer turi, murojaat vaqti, oxirgi kirish vaqti.
Bizga Telegramda yozsangiz, nikingiz va yozishmalar Telegramda qoladi va uning qoidalariga bo'ysunadi.

Diagnostika natijasini ko'rsatish va keyinroq qaytib kelishingiz uchun saqlash.
Urinishlarni o'zaro taqqoslash va ball qanday o'zgarayotganini ko'rsatish.
Supportga murojaat qilgan bo'lsangiz, javob berish.
Reklama uchun ma'lumotlar ishlatilmaydi. Saytda tashrif hisoblagichlari va reklama piksellari yo'q.

Akkaunt, ism va javoblar uchun asos — sizning roziligingiz: uni ro'yxatdan o'tishda katakcha bilan berasiz, shu paytgacha akkaunt yaratilmaydi va javoblar serverga ketmaydi.
So'rovlarning texnik ma'lumotlarini hosting va Supabase loglarga avtomatik yozadi — sayt birinchi ochilishidan boshlab va rozilikdan qat'i nazar: busiz sayt ishlay olmaydi va hujumlardan himoyalana olmaydi.
Rozilikni istalgan payt Telegram orqali qaytarib olish mumkin. Qaytarib olish — akkaunt va barcha natijalar o'chirilishini anglatadi.
Qayta ishlash O'zbekiston Respublikasining «Shaxsga doir ma'lumotlar to'g'risida»gi qonuni (O'RQ-547) bilan tartibga solinadi.

Ma'lumotlar bazasi va autentifikatsiya Supabase platformasida ishlaydi. Uning serverlari O'zbekistondan tashqarida joylashgan.
2026-yil martidan boshlab mamlakat ichida majburiy saqlanishi shartlar — faqat biometrik va genetik ma'lumotlar hamda aloqa operatorlari abonentlarining ma'lumotlari. Bularning hech birini yig'maymiz, shuning uchun chet elda saqlashga qonun yo'l qo'yadi. Transchegaraviy uzatishning rasmiy protseduralaridan o'tmaganmiz: yangi tahrirga oid qonunosti hujjatlari hali qabul qilinmagan.
Ma'lumotlarni uchta texnik maydon qayta ishlaydi, boshqa hech kim emas: Supabase (baza va autentifikatsiya), sayt hostingi (IP va brauzer turini loglarga yozadi) va Supabase pochta xizmati — manzilni tasdiqlash va parolni tiklash xatlari u orqali ketadi.

Xizmat qabulga tayyorlanayotgan maktab o'quvchilariga mo'ljallangan — odatda bu 14–16 yosh.
Qonun voyaga yetmagan shaxs uchun rozilikni qonuniy vakil yozma shaklda berishini talab qiladi. Interfeysimizda bunday protsedura yo'q, yoshni ham so'ramaymiz: ro'yxatdan o'tishdagi katakcha faqat foydalanuvchining o'z roziligini qayd etadi. Shuning uchun iltimos — 18 yoshga to'lmagan bo'lsangiz, ota-onangiz bilan birga ro'yxatdan o'ting va ularga bu hujjatlarni ko'rsating.
Ota-ona bolasi haqida bizda qanday ma'lumotlar borligini so'rashga va ularni o'chirishni talab qilishga haqli. Buni sabab so'ramasdan bajaramiz.

Reklama va analitika cookie-lari yo'q.
Brauzer localStorage'ida autentifikatsiya xizmati sessiyangizni saqlaydi — busiz har sahifa yangilanganda akkauntdan chiqib ketgan bo'lardingiz.
Vkladkaning sessionStorage'ida o'tib bo'lingan diagnostika javoblari vaqtincha turadi — ro'yxatdan o'tib natijaga qaytguningizcha yo'qolmasligi uchun. Ular muvaffaqiyatli saqlangandan keyin va vkladka yopilganda o'chiriladi. Testning o'zi davomida javoblar hech qayerga saqlanmaydi: sahifani yangilasangiz — test boshidan boshlanadi.

Ma'lumotlar akkaunt mavjud ekan saqlanadi. Faollik bo'lmaganda avtomatik o'chirish yo'q: shunchaki kirmay qo'ysangiz, ma'lumotlar so'rovingizgacha qoladi.
Hosting va Supabase loglaridagi texnik yozuvlar o'zining odatiy rotatsiyasigacha saqlanadi — akkauntni o'chirish ularga ta'sir qilmaydi.
Ma'lumotlar nusxasini olish yoki akkauntni o'chirish uchun Telegramga yozing.
Interfeysda mustaqil o'chirish tugmasi hozircha yo'q — so'rov qo'lda ko'rib chiqiladi. Profilni tahrirlash ekrani ham yo'q: ism yoki pochtani to'g'rilash uchun bizga yozing.
Siz ma'lumotlaringiz nusxasini olishga, noto'g'rilarini tuzatishga, ularni o'chirishga, rozilikni qaytarib olishga va harakatlarimiz ustidan vakolatli organga shikoyat qilishga haqlisiz.

Bazaga kirish satr darajasidagi siyosatlar bilan cheklangan: foydalanuvchi faqat o'z yozuvlarini ko'radi va o'zgartiradi, boshqalarning natijalari unga yopiq.
Parollarni autentifikatsiya xizmati xesh ko'rinishida saqlaydi, sayt bilan aloqa HTTPS orqali boradi.
Ma'lumotlaringizga daxldor sizib chiqish haqida bilib qolsak, bu haqda Telegram-kanalda va shu sahifada xabar beramiz. Alohida xabarnoma tizimi yo'q — pochta orqali bildirishnoma yubormaymiz.

Siyosat o'zgarsa, sahifa tepasidagi sanani yangilaymiz — uni kuzatib boring. Kirishda o'zgarishlarni ko'rsatadigan mexanizm va xabarnoma tarqatish hozircha yo'q.

Bu hujjat bo'yicha savollar — Telegram @mr_asilbekkhondamirov